Tāngata

Wayne Ngata-Ngāti Ira.

He uri mātau ko ōku karangatanga nō ngā taiao o te Tairāwhiti, nō ngā parapara hoki o ō mātau mātua tīpuna. He kaiārahi au i ngā takatakahanga taiao e mākū anō ai te kiri i te pia o te rākau, i te huka o te maunga, i te ua o te rangi, i te mana o te moana.

Basil Morgan Jnr -Ngāti Kati.

He uri au nō Te Tairāwhiti whānui.

Kua 20 tau i ngā kura rūmaki reo (kura tuatahi, wharekura, whare wānanga), hei kaiako, hei kaiārahi, hei kaitiaki. E manawanui ana au ki te āwhina i te tangata kia eke ki ōna taumata, kia whāia hoki te mānako o te ngākau, te ara tūturu o tōna pītau ira. Mauri tū, mauri tau, mauri ora!

Te Aroha Paenga -He uri nō Ngāti Porou, Ngāti Konohi, Ngāti Rangi.

Kua 12 tau i ngā kura rūmaki reo me ngā kura auraki. Kua noho hoki hei kaimahi whakawhanake i ngā kaupapa māori mō Ngāti Konohi, mō ngā iwi o Tūranganui-a-Kiwa. Waimarie ahau i te noho ki raro i ngā parirau o Tapuwaekura. Ka aroha atu ki ngā āhuatanga katoa, te whai atu i ngā mātauranga māori, te mātai atu i ngā momo taiao. Mātua te whakatakoto huarahi e whai oranga ai te Māori i ōna taiao.

Melissa Mackey-Huriwai-Nō Ngāti Porou me Te Whakatōhea.

Kua whakaako ahau ki te kura o Manutuke mo ngā tau 14 kua pahure. He kaiwhakahaere hākinakina ahau ki Tūranga, e ngana ana ki te akiaki i te tangata ki te whakapau kaha i ā rātou mahi kātoa ahakoa te aha. E ngakaunui ana ahau ki tēnei kaupapa a Tapuwaekura, te hoki atu ki ngā mātauranga taiao, Māori anō, te whakaora i ngā kōrero atua. He oranga tinana, he oranga ngākau, he oranga wairua.

Waimarie āku tamariki, āku iramutu i tēnei kaupapa kua whāwhātia, kua rangona e rātou hei tuitui ki tō rātou ao hurihuri hei tikitiki mō ō rātou māhunga.

Kiwi Campbell-Ngāi Tūhoe, Te Whānau a Apanui, Ngāti Porou.

He kaiako, he kaiārahi, he kaituitui, he kaiwhakahaere kaupapa i te kuratini o te Tairāwhiti (EIT) mō ngā tau 16. He toki anō ki te hoe waka ama, ki te whakaako hoki, i te motu, i te ao. Mātua te whakatakoto huarahi e whai oranga ai te Māori i ōna taiao.

Kerehama Blackman - He uri nā Te Aitanga a Hauiti, Ngati Porou whānui. He kaiārahi āhau i roto i te rōpū o Tapuwaekura. He kaupapa whai mātauranga i te taiao. He tino pai ki ahau tēnei kaupapa hei tiaki pai i te tangata.

Kimiora Atkins -He uri au nō Ngati Porou whānui.

Nō te mutunga o te tau 2019 i oti taku tohu kaiako. I mua noa, he kaiawhina ki ētahi o ngā kura kaupapa Māori o Te Tairawhiti. He tangata kaitiaki taiao ahau. E aroha nui ana ki te taiao, nā reira ko tōku aronga ki a ia me te iwi Māori. He honore nui nāku te noho tahi ki te taha o te whānau a Tapuwaekura kia taea ai te kimi huarahi hei tūhono anō te Māori ki tōna taiao.

Earle Karini-He uri nō te Tairāwhiti, nō te Taitokerau anō.

Kua 19 tau ki roto i ngā kura auraki, kura ā rohe,kura Aho Matua, kura ā Iwi hei kaiāwhina, hei kaiako, hei tumuaki tuarua hoki. He Kaiarotake ā Motu mō Taumata ā Motu Kua Taea (National NCEA Moderator) mō Te Reo Rangatira me Te Reo Māori. He Taura Pouwhakarae (Pouwaru) nō Te Whare Tū Tauā o Aotearoa. Pārekareka katoa ki taku ngākau ki te āwhina i te tangata kia eke ai ki ōna taumata.

Terina Te Karu -He uri nō Muaūpoko, Rangitāne, Kahungunu.

Kua 15 tau i ngā kura Aho Matua, Kura-ā-iwi, kura Mana Motuhake hei kaiāwhina hei kaiārahi, hei ringa toi. Aroha ana ki te rongo atu i ngā tamariki e hīkaka ana ki te ako. Me poipoi i te ākonga kia puāwai ai tōna tipu. Ka nanao atu ki ngā kōrero a tuaukiuki, ki a pēperekōu mā, ki ngā taonga tuku iho hei ārahi i a tātou. Tūhuratia, wānangatia, manakohia.

Hemi Tai Tin- He uri tēnei na Ngāti Hine, Ngāti Manu, Ngā Puhi, Ngāti Tūwharetoa, Ngāti Hāmoa, Haina anō hoki.

Kua 24 tau hei kaiako i roto i ngā Kura Kaupapa Māori, ā, kotahi noa iho rā te kura auraki. He pononga nā Te Whare Tū Taua o Aotearoa mō ngā tau 36. Ā, waihoki rā te roa o te hīkoi i roto i te ao haka. He mea nui kia whakatumatumahia ngā tū akoako i te ao i a tātou kia wātea ai ki te noho Māori tonu i ō tātou kaupapa Māori. He tauira nui te wānanga o mua hei mea arataki i a tātou ki ō tātou mātāpuna o te mōhio, ora, maungārongo anō hoki. He mea nui te tauawhi, te tautoko me te tautiaki i a tātou e rapu ana i te mea ngaro. Kāti, kotahi ia te whakahau, whāia!